يوميات الطالبه بالجامعه

من طرف Admin الأربعاء أكتوبر 03, 2007 9:00 am

طبعاً راح اسولفلكم على اليوم الدراسي للطالبة او البنت الجامعية وكالأتي:-

تجي امها من الصبح ولج كومي عمشة لحد الآن نايمة مو راح يجي الأشتراك مالتج والتالي وياج ...ترد البنت أي يوووووم (اكول يوم لو شهر)...

المهم تكعد الخاتووون هية وكفشتها وتروح تغسل وعلى غفلة تصيح اهووووو هم هاي الصابونة...(الخاتونة تريد صابونة دوف...الله يرحم صابون الوجبة اللي جانت تغسل بيه حتى اذا وجها مابي شي يتوسخ)...

بعدها تروح تتريك تاكل لكمتين جبن كيري وتشرب جاي الوزة(الله يرحم اللبن المحمض اللي جانت تاكله وجاي الوجبة ابو البسامير)...بعدها تروح تتبدل وتطول فد نص ساعة يالله تتلكيلها هدوم وطبعاً تكوم تتأفأف لأن ما كاويتهن للهدوم...المهم تكويهم اذا اكو كهرباء وإذا ماكو تكلبها عزا ويجوز متروح للكلية...

بعد ماتبدل الخاتون تجي عالفقرة الأهم عدها وهي على كولتهم(الميك أب) يعني المكياج وتجي الخاتووون تظل تخلي (طحين صفر) لحد ماتصير زركة وطبعا لمن تشوف نفسها بالمراية تحس نفسها عبالك انها ملكة جمال الكووون...

وعلى غفلة يجي ابو الخط عاد تكوم تستعجل خطية تعبانة وجاها الخط من وكت...وتبدي عاد تتلوك لأبو الخط (دقيقة-بس لحظة-ثواني واخلص-خمس دقايق) المهم ابو الأشتراك يشوف جد جده علما تخلص الخاتون وجمالة من تصعد تكول لصاحباتها شو اليوم من وكت يعني ضربته بسمار للمفجوع اللي انشحن خوش شحنة...

تصل للجامعة وطبعاً المحاظرة الأولى سلملي عليها ماتفوتها والله بحجة الطريق والأزدحامات وكَبل طرررررب تلكاها بالكافتريا هية وصديقاتها تروح تاكل عبالك معرف شني 100مرة تتريك...وتطلب حسب الجيب ياهمبركر اذا الدبل صاعد و فلافل اذا الدبل نازل وطبعا تتحجج بالريجيم وطبعا ويا اللفة تطلب (الكاباتشينو) اول مرة اشوف كابتشينو ويا لفة الفلافل...بعد ماتاكل عاد ترجع للقسم وتتفاجئ بامتحان وطبعا هية متدري ملتهية بالمسلسلات(باب الحارة-اشواك ناعمة) وقنوات الأغاني (روتانا واخواتها)...تطب للأمتحان وتطلع ممجاوبة يا قبل الأمتحان تدوخن (واخ راسي اخ بطني) تريد اجازة وطبعا هية كلشي مابيها...بعدها تعرفون الأمتحان يجوع ومرة ثانية عالكافتريا هي وصديقاتها وراها يطلعن يتفتلن ويزورن صديقات الأعدادية وعبالك اول مرة يشوفوهن يستلموهن دك بووس ويظلن يسولفن وياهن الى ما ابو الأشتراك يجي و يدك عليهن...فتركض للخط مالها وترجع للبيت تريد تنام ومتتغدى خطية سودة علية تعبانة من الدراسة والقراية وطبعا كل يوم على نفس الموال...

هااااا شباب شلون تحشيشة اريد رد منكم وما اريد يزعلن الصبايا علينا ترا دنشاقة وياكم....